搜尋此網誌

2008年8月23日 星期六

不愉快的晚餐@茶軒


大家睇相係咪覺得呢餐應該唔錯呢?本來我都預計係架,但可惜唔係不得已,仲係食得非常不愉快,幾乎想拍檯走人,連一向好少提出投訴0既老公都話呢間野唔投訴唔得,可想而知幾嚴重。


最後,我係完全食完都唔知咩味架囉,因為已經餓到暈同無埋嬲到無哂心情喇!


事源今晚我同老公去左新城市廣場0既茶軒晚飯(請留意本人列明只是新城市廣場分店,其他分店暫時未有任何要投訴的地方),因為我地兩個已經好餓,又見佢唔需要等位,咁我地入果陣有兩班人等,我地兩位同後面四位,帶位果個見住後面有四位,仲畀左四人位0既一邊我地坐,轉頭唔夠兩分鐘見無四人位,就叫返我地起身去第張兩人位,其實佢帶位果陣我已經覺得怪,但見佢咁帶咪照坐囉,最後咪又係要轉檯。


上面果樣已經係非常小事,我地如常咁睇餐牌落order啦,記得果陣約7點半,當時間舖唔算話好多人,而且大部分都已經食緊,剛坐低叫野0既其實唔多,我地一路等一路等,d 野食都無黎,甚至連野飲都係無影,果陣都差唔多8點,眼見其他遲點菜0既d野都黎喇,我地乜都無,當然請待應幫我地跟跟張單啦。轉頭果位待應同我地講話有落單,叫我地等多兩三分鐘,ok,聽你講等囉,雖然已經餓到頂唔順咁滯,但既然待應咁講,我地咪當你可能廚房好忙,照等囉。


當然結果並唔係佢講0既兩三分鐘啦,等多成十分鐘都無野黎呀,咁咁0岩我地撥手果陣係個店長埋黎,咪同佢講d野真係等左好耐,請佢再跟跟,雖然佢語氣無乜野,但佢係黑住面答我地囉,仲係無乜耐性咁答句:等多陣啦,有架喇!嘩!我地都等左唔只一陣啦,問完一次又一次都仲係等囉!


老公呢個時候已經好嬲,諗住同d 待應講我地唔要喇走喇,點知佢一舉手就黎杯野飲,咁我地見黎杯野飲囉,就姑且睇佢係咪好快黎埋野食啦。我諗劇情發展大家都估到,當然我地又係得個等字啦。我同老公講不如淨係pay for 杯野飲0既淨價,其他全部唔要喇,因為太耐喇等得,點知又係一講完我果碟野就黎,就係相入面果碟喇。坦白講,我當然已經餓到傻左,因為胃0既問題我係唔餓得的,所以野一黎就係咁食係咁食,完全食唔到佢係乜味囉!


我果個冷麵係九個字之後先黎,老公果個仲係影都無,但老公知我肚餓頂唔順,所以都叫我唔好理食左先,佢話到我食完佢都未黎,佢就會取消果份走。都唔知係咪玩野,就係我食完自己果份待應收野果刻,老公果個就黎囉!


雖然最後我地都係有食,但就食得好唔開心同好不滿囉,冷麵要整成九個字,菜飯要成個鐘tim,真係勁離譜,最過份係d 待應話幫我地跟但勁敷衍,求其講個時間由我地繼續等,個經理就直頭係唔耐煩兼黑面,搞到好似我地追單係我地唔0岩咁,早知寧願等位食第度好過。我記得以前呢度係有熱線架,依家無左囉,老公話問佢地都唔會畀,返黎上網search好過。


經過今次事件,我諗我唔會再黎呢間分店囉,坦白講,我以前好鍾意呢間餐廳架,但近年佢d 質素已經越黎越唔得,價錢又越來越貴,服務態度不嬲都唔算特別好,依家仲要差仲咁,又咁低效率,真係好失望囉!!


 


 


 


 


1 則留言:

  1. 我以前久唔久都會幫襯吓 , 雖然佢地d飲品真係做得好差 , 但其他嘢食都算ok ~ 不過最近兩次就好唔同喇 , 因為同朋友買左飛睇戲 , 所以趕時間唔可以排隊等其他餐廳 ,於是咪食佢囉 , 唔知點解佢地經常都有大把位唔洗等 , 應該就係因為d食物同服務質素差既原故喇 . d嘢食唔係好難食 , 但同個價相比就覺得唔抵 , 如果唔係唔想排隊就一定唔會再食佢地 ~~
    [版主回覆08/26/2008 22:22:00]佢地真係越做越差呀,我諗我都唔會再去囉

    回覆刪除