搜尋此網誌

2009年2月18日 星期三

Addict to CS!!

Blog 間的火燒得旺盛,我也去了趁熱鬧,先買了盒平常少買的大地色系28色眼影,一買之下,不得了,完全是著魔了。




這盒部分顏色是啞色,有部分是輕微珠光,特別喜歡左上角的顏色。



被上面那盒大地色引入魔道後,我再入了28色胭脂加24色閃眼影。




胭脂的顏色也很漂亮呢!當中有些有很閃的閃粉,但拍出來看不到呢!




這盒眼影24色也很漂亮,也算閃,上眼後效果比拍出來閃很多呢!其中紫色和紅色系的效果很好看。

其實除了上面三盒眼影,我還買了一個CS eyeline,是Deep Plum,真的又出色又持久,配上面的紫色眼影非常好看呢!



有關我的十六件事

我真係好遲呀,但寫左就照post啦!

被人tag左好幾次,一直諗住快d寫返但又無時間,記得n年前寫過「我的1-100」,依家諗返都唔記得寫過乜同點解寫到咁多,事隔多年,我諗呢16項應該有大不同卦!

規則:當你比人tag左,就要寫一篇note,內含16項有關你的事情,習慣,喜好,目標....或任何各不相干但有關你的東西。最後tag另外16個人。你必須tag返tag左你的那個人。如果我tag左你,即係我想認識你更深。

1.我其實真係無乜朋友,可能同我唔太曉主動搵人有關。各位朋友仔,真係想講,我唔搵你地唔代表我唔當你地朋友,但若果我會主動搵你地想見你地,我一定一定係好重視你呢位朋友。朋友仔,你地當我係朋友的話,都請0向記得我果陣,主動搵0下你呢個勁被動兼半自閉0既怪朋友啦!

2.因為真心朋友難求,所以我非常珍惜同著緊每位朋友(雖然我唔太識點表達)。奈何人生就係會有變化,唔同時期0既best friend都因為不同原因甚至無原因咁淡出左我0既人生,每次我都會好傷心覺得好可惜,最無奈係我無咩可以做到。當中有三次我覺得最可惜同最痛,到呢刻諗返我d眼淚一樣係忍唔住想流出黎。依家仍然係我身邊0既babe們,我真係唔想失去你地,或者我個人真係唔識表達自己0既感情,不過我相信你地會感受到我有幾愛你地架!Friendship forever講落好似好老套,但呢個的確係我所願。

3.我d敏感症幾乎全身都有囉,皮膚敏感:多汗、乾燥、污糟、用完清楚用品後,都一樣會敏感,痕同紅已經小事,嚴重上黎後爛囉;鼻敏感,敏感起上黎feel到自己個鼻好似就甩囉;聽覺敏感,稍為高音我都會耳痛,嘈d我都會暈、頭痛同想嘔;氣管敏感及哮喘,呢樣係我最大0既困擾,少少野都會令我呼吸困難,煙味、廢氣、空氣侷促、天氣凍d、運動量大d我都會頂唔順;腸胃敏感,我幾乎病親都會肚痛肚屙,去親飲後九成會肚屙,凍d我個肚又會黎料,一緊張就更加唔講得笑,討厭。每年0既願望都想身體健康,真係好想。

4.其實我係一個諱疾忌醫得好緊要0既人,我勁驚睇醫生,更加驚做檢查,基本上係避得就避,但無奈我身體唔爭氣,變左做醫生0既常客,0向各方壓力底下,黎緊我會盡快安排個body check 架喇!盡快囉!

5.其中一個怕睇醫生同做檢查0既原因,係因為由細到大我都勁怕陌生人掂到我,每次我都會好緊張好唔自在好不安等,所以我一定唔會去骨按摩,亦唔鍾意做facial,唔鍾意剪頭髮,仲有買內衣果陣都唔鍾意人地入fitting幫我囉!um,諗落其實我係連人地見到我0既身體我都會好唔自在,所以好討厭0向更衣室著衫換衫,就算更熟0既人都係咁話。(當然老公就無辦法啦,唔通唔畀佢望同掂咩?哈!)

6.雖然0向人前我成日話我老公,但其實我勁錫佢同勁縱佢,仲有佢私底下係成日笑我蝦我整蠱我喝我鬧我,同埋發憎同發脾氣架囉!我就到佢咁得戚同過癮,佢係咪好應該0向人前畀0下面我先?佢d好野就大家眼見啦,但佢d衰野就只有我見到囉,佢咁樣係咪叫隱惡揚善呀,哈!

7.其實我係超級勁討厭做家務囉!結左婚之後因為我錫住我老公,加上睇唔過眼,所以迫住做左九成幾家務囉!明明有人應承過我話唔駛我做佢做架,呃人0既!

8.樣樣野都得三分鐘熱度,成日滿腔熱誠想學唔同0既野 / 陪人學唔同0既野,但無一樣可以成功學好,其中一個原因我好易覺得悶同攰,又成日唔願搭車出去上堂,變左九成要搭車出去學0既野我都會好快無心機,到依家大左又越來越忙,對學野就更加有心無力,去學都無時間溫習同練習,真係要好好改善一下。

9.我好鍾意百合,已經不只一次0向類似0既tag 度提及過,但我唔係每種百合都鍾意,只係鍾意純白百合,記得以前同友人講過, 0向我死左之後,雖然我未必會知,但仍然大家會拎住百合花去我0既喪禮同拜祭我。

10.我好鍾意影相,曾經好努力去研究點樣影出黎0既效果先靚,以前淨係鍾意做影果個,依家鍾意做埋被影果個,因為每一張相都幫我紀錄左我生活中0既一點一滴,將來都會成為我值得懷愐0既回憶。我好想趁我仲行得走得,可以去到唔同地方留低足跡同影相留念。

11.我真係好鍾意唱歌,雖然依家根本無乜時間同機會去唱,但我依然對唱歌0既熱愛從來無減退過,亦真心覺得自己把聲係好聽架!(雖然我一對得多人就唱唔到勁失準,但呢個我都唔想架嘛!)我好希望可以抽返多d時間去唱歌,唔係耐無唱會生疏架!

12.曾經我戒過任何有氣0既飲品,仲係戒左好多年,但自從同左老公一齊左後,因為佢太鍾意飲可樂,整整0下搞到我都飲返,真係作死囉!依家好希望可以快d戒返甩所有汽水(雖然真係有難度),我真係覺得好唔健康同埋好肥囉!

13.其實結婚果陣真係有多唔開心發生,亦有唔少遺憾,但過左去0既無得改變,所以我希望十周年0既時候可以約返d朋友搞返個難忘0既慶祝party,去彌補當初0既不完滿。唔知到時真係搞得成有邊個會願意出席呢?

14.果陣有唔少人以為我係奉子成婚,又睇死我地係一時衝動,依家成兩年喇,大家有眼見啦!我唔係有左,亦唔係玩兒嬉,邊個話早結婚就係唔夠成熟?邊個閃電結婚一係奉子、一係一時衝動?0係我同呢個人一齊0既時候,我已經好清楚呢個人,亦肯定佢一定比任何一個話愛我0既人更愛我;0係佢想我同佢一齊果陣,佢已經好清楚咁講明想我嫁比佢,因為佢唔想再一次失去我。既然難得一齊,又真係結埋婚,我希望係可以一生一世,相信佢都一樣咁希望。

15.人越大越來越怕老,以前我愛素顏,亦懶理護膚,近年已經開始有大改變,開始注意護膚(雖然仍然好懶),亦越來認真研究點化妝(雖然仍然好多技巧未識),我真係唔想咁快就老態浮現呀!我要後生我要靚(有幾多年得幾多年啦),要努力!

16.唔該唔好再祝我早生貴子、年生貴子,我真係想講”睬” 囉!我唔係一定唔會生,但點都唔係依家囉!畀多幾年時間我啦!我好想繼續做小朋友,繼續自由自在,繼續二人世界呀!最起碼等我地經濟穩定,有多餘錢,去返幾次旅行,影返婚紗相,換埋層樓同埋有份更好0既工先啦!要我依家做人阿媽,真係諗都唔想諗,最重要係我feel唔到我老公似會做人老豆囉,咪即係要我揍多個?!

2009年2月17日 星期二

又病了

唔知係咪星期日涼返吹親,我尋日已經開始病,朝早請左假,夜晚勁早就走去訓。


唔知又係咪尋日畀個學生傳染,尋晚半夜咳到我半死,無覺好訓,今日本來係要返學架,但我返黎諗住抖親出去,轉頭就昏迷左,訓醒已經七點幾八點,但醒果刻仍然係頭重重、手軟腳軟,咁唯有繼續訓囉,訓到老公放學返黎買野畀我食先起身~


依家又好疲累喇,又要訓喇~


2009年2月15日 星期日

牛年首次BBQ

今日同我兩個最愛0既babe連埋同事輝join左Carman 搞0既BBQ活動,其實我個人無乜特別興趣識新朋友,不過Cathy 想BBQ,我又想同佢一齊BBQ,所以咪拉埋一行四人去囉,哈!




我個傻B~




兩個我最愛0既Babe~




同事輝,佢勁衰,勁唔願同我影相,歧視人妻呀~~~




其實同事輝我老公舊同事,所以一識果陣就叫落同事輝,跟住就無改過口喇~




梗係要抱實我個babe影返張相啦~




BBQ無涼菜揀0既時候,最正就係飲可樂,yeah~







又見到Cryus,佢係個nice guy 黎呢~~佢著桃紅色幾好睇~




我唔鍾意食肉,麵包係必燒之選~




全女班影張合照先~扮cute中~




阿Moon好狼呀,想咀Carman~




呢個我都唔太知扮緊乜,哈~







正經d影返張啦~




大合照又點少得呢~



可能因為自上次腸胃炎之後胃口細哂0既關係,我好快就投哂降,最多悶果陣燒d肥、丸或燒畀人食,但Cathy同阿輝可能打牌同玩遊戲,走果陣都話未飽,我深信食甜品係有第二個胃,豁出去同佢地落返旺角食許留山,今次食左個咩雪蓮咁架,係熱架,有木瓜雪耳同雪蓮果,好潤好清甜,燒完野食0岩哂~~~終於就係飽到傻咁返屋企囉~~

天天都是情人節

今年因為大家都要返工做野,所以都無乜特別準備,都係出去食餐飯,影0下相,去尖東行0下咁,其實我地兩個都唔係太特別著重呢d節日。
今年係第一年無花,上次生日果次我話過拎住紮咁重0既花其實好辛苦,同埋見住紮花凋謝個下,感覺唔係幾好,個心好唔舒服,我寧願佢送盆栽或者假花或者將d錢買埋禮物送畀我,花我地兩個都睇唔0岩,禮物都係一樣,兩個都唔願意對方花太多錢,因為情人節、結婚周年都只不過係一個日子,就正如老公所言,唔一定情人節或大時大節先黎送花送禮物慶祝,只要係同情人過得開心0既日子,只要係情人真心真意送0既禮物,咩日子都可以係情人節,咩禮物都可以係情人節禮物!
衷心祝願天下有情人日日都係情人節!





























連阿拉麵館都整哂情人節佈置呢!




傻老公整古做怪,低能架!




哈,老公情人節一朝日就0向pet society 送左個我想買好耐要成1200蚊皇冠,同果籃要成1800 0既粉紅玫瑰過我,話情人節點都要送禮物同花喎,勁搞笑呀!!




因為最終出去我無野想買,花亦睇唔0岩,所以之後再補多紮粉紅玫瑰囉!佢真係傻架!!

2009年2月14日 星期六

不經不覺已兩年

今日係情人節,原來唔經唔覺已經結婚兩年,兩年,對一段婚姻黎講,其實只係好短0既時間,但諗返結婚果日到依家,原來轉眼間已經兩年,好快。

我唔識講我呢刻0既感覺,只係覺得兩周年都不過係一個日子,其實同平時都每乜大分別。事實上,我地一直都比較平淡,每一日對我地黎講都係一樣,當然大時大節都會慶祝,但唔會話特意安排去做d乜囉。

可能係我地兩個都比較懶,又可能係我地兩個成日都見住,除左返工返學之外,幾乎九成時間都係同對方一齊行動,唔係話唔想畀驚喜對方或唔願做d乜,而係真係無空間同機會。(哈,呢個係佢畀我0既理由,但我諗落都真係合理0既。)有時都會想安排d特別d 0既活動,但問題係我地兩個0既時間太難就,好難安排d需要長時間同好多精神0既活動。

就好似今日,本來係想join 士多啤梨團,但問題係佢今朝先放工返黎,起碼都訓到三、四點,當佢唔訓咁耐陪我,我都唔想啦,因為咁,我又會堅持照補習,咁即係我地兩個起碼要四點幾先見到,到佢整得野黎出得門口都五、六點,其實都無乜地方可以去。

另一樣就係我地都係會怕人多同迫0既人,有時會寧願留0向屋企,只不過係明知留0向屋企兩個都實係會走左去訓,所以先會諗出去走動一下。

到依家都未安排今日會去邊,不過我要返工補習,等佢訓醒先再算啦。我對兩周年無特別期待,唔係因為麻木左,而係因為已經非常了解對方係一個咩野人,或者有驚喜有準備係會開心同感動,但即使無我亦會感恩身邊陪我走0既仍然係佢,最重要係,佢仍然係同當初一樣咁愛我。

兩年婚姻生活令我體會到,穩定會令男人變得奉旨同疏懶,而結左婚之後0既態度同當初拍拖亦會有改變,熱情會歸於平淡,著緊變成安心信任,可能仲有更多更多變化,但我亦知道0向呢一切變化之下,佢對我0既愛,並無因為咁而有所改變。

就如一眾情侶,我地會有甜蜜恩愛0既時候,亦有爭執冷戰0既時候,更會有心酸痛苦0既時候,我無計過邊一種感覺較多,反而慢慢學識左避重就輕,選擇性去放大開心0既感覺,只有咁樣先可以令一段感情歷久常新。當然,得我一個咁諗係無意思,但我好開心咁見到自己0既另一半係咁樣做,而且可能做得比我更早更好。無人係完美,佢當然亦唔係,可能仲有好多大大小小令人激到想吐血0既缺點,但咁又點,咪又轉眼就兩年。兩年一眨眼就過,我相信往後0既每一年,都繼續會係不經不覺咁過渡。

我希望0既係,成長0既變化唔會令我地兩個之間0既感情變質,希望將來去到每一個階段,我地都會記得呢刻我地咩都無0既時候曾經共過0既患難,同埋可以一直一直相愛到老。

謹祝各位情人節快樂!

2009年2月6日 星期五

病痛快點遠離我

其實有很多事想寫想記,奈何我自年初五起開始生病,至今還未完全康復,吃不下睡不好,更勿論寫日記了。


這次病了很久,初期我天真的想靠自己打敗病魔,可惜太辛苦了,最終還是找西醫打救,終於,服第一次藥之後不到五分鐘就吐了五次,吐後竟然終於感到舒服了點。最離奇的是那幾天我根本沒吃什麼,不知何來哪麼多嘔吐物。


持續沒胃口,想起要吃什麼,買了回去又吃不下,吃粥也吃到想吐了,瘦了好幾磅。如果繼續維持現時的飲食,相信很快會回到結婚時的狀態。但問心,我真不想因病消瘦,寧可辛苦點多做運動。


每年也祝願自己身體健康,希望這次病好了,今年也不要再病好了。


2009年2月3日 星期二

日文第一次測驗成績公佈

今日係今次學日文第一個test 0既成績公佈,初頭真係有d 驚,雖然有信心會pass,但就覺得會低分,因為好多部分我都唔肯定,同埋我覺得自己溫得麻麻囉。



但係,結果出乎我意料,我有溫0既部分全部無錯,而無溫0既部分,可能因為上堂有聽書,都0岩左好多,最終係有90分呀!雖然班上有好幾位同學100分,但我自知自己無乜天份又無乜時間溫書,有90分已經係超出我所預料,勁開心呀!

仲要有塊得意擦膠做禮物呢!哈!



要繼續努力!