搜尋此網誌

2007年4月11日 星期三

洗頭洗到差0的喊囉!

今日入青衣見工,之後同老公落左葵芳食意粉屋,叫左兩個都係有酥皮湯0既意粉餐,點知個湯到之後,一望,嘩,一個咁高,一個咁扁0既?!大家都係酥皮湯0者,點解差咁遠0架?

兩個都係酥皮湯0者~~點解差別咁遠0既?



我覺得用個蓋cup住果個樣好搞笑呀~~

之後0向新都城同葵涌廣場行,葵涌廣場d 衫真係勁平囉,好耐無買d咁平0既衫衫喇!!不過間間都唔收咭又無EPS,超麻煩!!下次去行要預早定現金先得囉!

跟住返大圍,老公去左睇醫生,因為佢修腫左呀,腫到頭痛頸痛,講0野同食0野都好辛苦呀,尋晚仲痛到工都返唔到呢!好彩連續目訓返十幾小時之後(搞到我都陪佢目訓足十幾個鐘囉,由尋日下晝四點目訓夜晚十點起身落街買0野食,食完再目訓到今朝十點囉!!好恐怖呀!今朝我地醒左玩左陣仲要忍唔住目訓到十二點幾先捨得起身沖涼囉!)好返d咋,唔係心痛死我。本來佢仲死唔肯睇話無事,我就梗係唔俾啦,佢仲要工都返唔到,想唔睇都唔得啦!仲想死拖,終於趕佢去睇啦!

等佢睇完醫生,我就join 埋佢去剪頭髮喇!大圍海福果度開左間新0既,於是我地就去試試啦,我其實都諗過點剪,淨係想修修佢同偷薄返就ok,主要都係陪佢啦!點知咁就俾我一次差d洗頭洗到喊0既經歷,話說同我洗頭0既係個女仔,咁開始洗0既時候都無乜事0既,有d 水噴到我都係小事,到佢開始搓果陣我就feel到有d問題,當佢搓一邊頭果陣,佢可以將個花灑同隻手d力積哂0向我頭0既另一邊囉,仲要一路搓一路"銀"個花灑埋我個頭度,幾乎痛死我囉,跟住佢"r"我個頭又勁大力喎,d 指甲又尖又長,係咁抓落我個頭度,又扯到我d 頭髮,真係痛死我囉。如果唔係費時佢俾老闆鬧,我實鬧鬼佢。點知咁原來都未算勁囉,之後佢幫我按個頭,嘩,係勁大力銳落我個頭度,好大力咁搓,我即時痛到瞟眼水想喊囉,又要死忍住唔俾自己叫出黎,但我feel 到我應該已經臉容扭曲囉,佢咁整我整左成分鐘,我就一路想喊想喊又死要忍住囉,我唔想嚇親老公同其他人嘛,但就真係超勁痛囉。仲有呀,人地遮耳仔係好細力按住,佢唔係囉,係一下就扭埋我隻耳囉,嚇鬼死我!佢咁都仲未夠囉,臨尾沖水果下,可以成個花灑d 水噴哂入我耳仔囉!最後到洗完包返毛巾,一起身就發現佢洗到我件袍濕哂,連入面d皮膚同件衫都濕左囉,你話係咪想死呢?!果一刻我真係委屈都想喊囉!

好彩之後剪頭髮果個人都幾好人,令我心情平伏返d,點知之後個髮型師幫我吹頭,叫返之前個女仔幫我拎住一束頭髮,個女仔可以係勁大力拉住,跟住連埋佢自己隻手,晾住0既我頭頂囉,全部力都過哂落我度,我個頭就好似俾d 重野責住咁,唉!跟住果幾次佢都係咁,後尾個髮型師叫佢細力d,但佢轉頭又黎過,勁慘呀我!

剪完雖然好似無剪過咁,但輕身左好多,都幾舒服,但個頭皮就好似被人抓損哂咁囉!到寫日記0既呢一刻都仲係痛囉!如果再去剪的話,我一定唔會再俾果個女仔掂我個頭!!!

剪完頭髮肚仔餓,去左本屋食日本0野,今晚個帶子唔係好得呀,不過其他都好好味呢!

兩個都剪左頭髮呀~~但我睇落好似無剪咁囉~~~老公d 蔭做乜咁長咁0既?

新髮形0向側面都幾好睇呢~~

睇0下d人打機打得幾鬼專心~~

唔戴眼鏡應該好睇d 0既~~但老公勁殘呀~~黑眼圈大到嚇死人喇~~

戴返眼鏡好唔同呢即刻~

食完返去,老公目訓多陣就返工喇,我就繼續寫故事喇,已經第三章喇,大家繼續支持啦!唉!我個頭仲係好痛,都唔知目訓唔目訓到。



老公覺豬豬個樣好傻瓜呀~~



2 則留言:

  1. 咁你結果係咪買左好多野呀??

    回覆刪除
  2. Re:係呀,今日買得仲多tim~~

    回覆刪除